كلب الست أم كلثوم لما عض واحد من الغلابة ( قصيدة كلب الست ) - أحمد فؤاد نجم

كلب الست أم كلثوم لما عض واحد من الغلابة ( قصيدة كلب الست ) - أحمد فؤاد نجم

أضيف بتاريخ ٠٤/٢٦/٢٠١٩
|

شعر و إلقاء : أحمد فؤاد نجم - رسم : منار عادل
فيديو جرافيك : محمد أسامه - موسيقى : محمد شعبان
كلمات القصيدة :
فى الزمالك من سنين .. وف حمى النيل القديم
قصرمن عصر اليمين .. ملك واحدة من الحريم
صيتها اكتر م الادان ..يسمعوه المسلمين
والتتر والتركمان ..والهنود والمنبوذين
ست فاقت ع الرجال فى المقام والاحترام .. صيت وشهره وتل مال
يعنى فى غايه التمام
قصره يعني هى كلمة .. ليها كلمه فى الحكومه
بس ربك لاجل حكمه .. قام حرمها م الامومه
والامومه طبع ثابت .. جوه حوا من زمان
تعمل ايه الست جابت ..فوكس رومي وله ودان
فوكس دا عبقال املتك .. عندة دستة خدامين
يعنى مش موجود فى عيلتك .. شخص زية يا اسماعين
واسماعين دا يبقى واحد .. م الجماعة التعبانين
اللي داخوا فى المعاهد .. والمدارس من سنين
حب يعمل واد فكاكة .. و يمشي حبة فى الزمالك
والقيامة والفتاكة .. يرموا طبعا ع المهالك
عم سمعة من قيامته .. حب يعمل فيها فلة
بعد ما ألوظ بيجامته .. اشترى حتة مجله
قول مشي يقرا فى حكاية .. من حكايات الغرام
واندماجه فى القرايه ..خلى مشيه مش تمام
ع اليمين يحدف بعيد . خطوتين ويروح شمال
لمحه فوكس من الحديد .. قال دا صيد سهل و حلال
هب نط فى كرشه دوغري .. جاب بيجامته لحد ديلها
اسماعين بدال ما يجري .. قال يا رجلي .. رجلى مالها؟
بص شاف الدم سايح من عاليها ومن واطيها
وياللى جاي وياللي رايح ..المجله مش لا قيها
حبه واتلموا الظنايا اللى هما البوابين
والحكايه والروايه قال لهم .. دا كلب مين ؟؟
كلب مين ما كلب مينشى .. سمعه زود حبتين
قاله واحد فيهم امشى .. اللى جابك عنده مين؟
قال دا شارع يا مواشي .. ل للى راكب و اللى ماشى
كلمه من دا وكلمه من دا ؟؟ ظاطوا واترسمت فضيحه
قول نهايته و القصد من دا .. اسماعين أكل الطريحه
راحو قسم الشرطه طبعاً .. والنيابه كفيله بيهم
واترموا فى الحجز جمعا .. لما ييجي الدور عليهم
حبة والشاويش امين .. قال : سعيد النقشيندي
قام غريم عم اسماعين .. قال له: محسوبك يا افندي
قام سي سمعه يروح معاه ..لشاويش قال : غور بدمك
راح تعوصنى .. وفوق قفاه كف طرقع
داهيه ف امك
تفتكر يفضل سي سمعه .. قد ايه فى القسم نايم؟
استضافه الحجز جمعه .. يا بلاش ادي العزايم
شاف بلاوي ما تتحكيش .. م الجماعه المسجونين
قال يا عالم يا شويش .. يا نيابه يامسئولين
خلصوه بعد المناهده .. جثه من جحر الديابه
هى حسبة ساعه واحده .. كان فى مكتب النيابه
قال له مالك يااسماعين .. قال لة زي البمب… مالي؟
قال له عضك فوكس فين .. قال له سيبنى اروح لحالي
انت شوف سي فوكس يمكن .. خد تسمم غصب عني
الوكيل قال برضة ممكن .. والشاويش قاعد يغنى
هيص يا كلب الست هيص ..لك مقامك في البوليس
بركة تتولف وزارة ..للكلاب ياخدوك رئيس
لمتابعة نوته على مواقع التواصل الإجتماعي :
Facebook: https://www.facebook.com/notah.official
Instgram: http://www.instgram.com/notah.official
Twitter : https://www.twitter.com/notah_official